ӘЛ-ФАРАБИ КІТАПХАНАСЫ ҰЛТТЫҚ ЭЛЕКТРОНДЫ КІТАПХАНАНЫҢ СЕРІКТЕСІ
- Шымкент қаласы, Қаратау ауданы
Қазіргі таңда электронды кітап оқу, кітаптың электронды нұсқасын алдыру дейтін дәстүр қатты дамып келеді. Бұл тұрғыда Қазақстандық ұлттық электрондық кітапхана www.kazneb.kz порталы 24/7 режимінде оқырмандарға кызмет көрсетеді. Іздеген ақпараттыңызды kazneb-тен табатыныңызға сенімдіміз.
Әл-Фараби атындағы кітапхана Шымкент қаласы бойынша бірден-бір аймақтық серіктес ретінде @kazneb ұлттық электронды кітапханасының қорын толықтыруға атсалысып келеді. Бұл жөнінде қалалық кітапхананың фейсбуктегі парақшасы сүйінші сұрай бөлісіп отыр.
Әл-Фараби кітапханасы KазНЭБ порталымен өзара келісімге сай 3 санат бойынша өзінің кітап қорын цифрлық форматқа көшіреді. Олар – цифрланған сирек кітаптар мен қолжазбалар; Өлкетану әдебиеті; Жергілікті қаламгерлердің шығармалары. Барлық сандық форматқа көшіру жұмыстары тек Авторлық келісім шартқа тұру негізінде жүзеге асады.
Ендігі уақытта шымкенттік кітапхана қорында тұрған сирек кітаптарды интернет желісі арқылы электронды түрде оқи аласыз. Әлемдік желіден қазақша кітаптарды, деректерді ізденуші қауым әлбетте, KазНЭБ порталының көмегіне жүгінері анық. Енді ол электронды кітаптар базасынан біздің қала кітапханасы ендірген еңбектерді «парақтау» мүмкіндігі туып отыр. Кітапханашылардың жаңашыл қызметтеріне тәнті болып, сәттілік тіледік.