БИЫЛ 20 МЫҢ ТҰРҒЫН ТАБИҒИ ГАЗҒА ҚОСЫЛАДЫ
- Шымкент қаласы, Абай ауданы
Шымкентте биыл №3 автоматтандырылған газ тарату станциясы іске қосылды. Оның қуаттылығы сағатына 250 мың текше метрді құрайды. Бұл нысан қаладағы газ тапшылығы мәселесін түпкілікті шешуге мүмкіндік береді.
Шымкент қаласында биыл тағы да 2 магистралды газ құбыры тартылып, 10 елді мекенде ішкі желілер жүргізіліп жатыр. Жыл соңына дейін 8 елді мекенде құрылыс жұмыстары аяқталады. Олар Тұран, Көкбұлақ, Ақтас 1-2, Батыс, Қайнарбұлақ, Сәуле (276 орам), Ақжар, Арғымақ, Нұртас, Солтүстік саяжай және Тассай елді мекендері. Нәтижесінде қаладағы 20 мыңға жуық тұрғын табиғи газға қосылу мүмкіндігіне ие болып, қамту көрсеткіші 94,7 пайызға жетеді.
Қазіргі уақытта өткен жылы ішкі жүйелердің құрылысы аяқталған елді мекендердің тұрғындары техникалық шарт жасау және оларды газға қосу жұмыстарын жүргізіп жатыр.
Осы орайда айта кетсек, өткен жылы Шымкент қаласында 5 елді мекенге табиғи газ жеткен. Яғни, Бадам-195 орам, Достық, Азат, Асар-2 елді мекендері мен Тассай шағын ауданының тұрғындары көгілдір отынға қосылу мүмкіндігіне ие болып отыр. Сондай-ақ, өткен жылы 3 магистралды газ құбырының құрылысы жүргізілді. Бұл жұмыстарға мемлекеттік бюджеттің есебінен 6 миллиард 100 миллион теңге қаржы жұмсалған. Соның нәтижесінде өткен жылдың соңында Шымкент қаласының тұрғындарын табиғи газбен қамту көрсеткіші 93 пайызға жетіп отыр.
Жалпы, Шымкент қаласын 2025 жылға дейін толық газдандыру жоспарланған.