Облыс көлемінде іріктеліп үздік деп танылған 17 қатысушы бақ сынаған балалар байқауын Облыстық білім басқармасы басшысының орынбасары Айгүл Қасымбекова мен Облыстық мәдениет басқармасы басшысының орынбасары Ержан Исатаев ашып беріп, байқаудың маңызына тоқталды.

Мазмұнды жиынға ҚР Оқу-ағарту министрлігі Республикалық ғылыми-педагогикалық кітапханасының директоры Әлия Сайдембаева мен «Ақжелкен» журналының бас редакторы, ақын Есей Жеңісұлы қонақ болып, жылы лебізін білдірді.

Балалардың өнерін республикалық «Ақылдым» журналының редакторы, «Қызмет» газеті жауапкершілігі серіктестігінің директоры, «Серпіліс» қоғамдық қорының директоры Бейсенкүл Нарымбетова, қоғам белсендісі, табиғат жанашыры Ғани Назарбек, Қазақстан Журналистер одағының мүшесі, Облыстық мәдениет басқармасының баспасөз хатшысы Тұрсынай Шаметова бағалап, қазылық етті. Ал байқауды «Уақыт ТВ» арнасының балалар редакциясының жүргізушілері тізгіндеді.

Байқау 3 кезеңнен тұрды. Алғашқы кезеңде «Адамгершілік, ізгілік, қайырымдылық» тақырыбында өздері жазған эссені әңгімелеп берді. Келесі кезеңде «Мен таңдаған тақырып» атауымен дайындап келген қабырға газетін таныстырды. Ал үшінші «Таным, талғам, тапқырлық» кезеңінде сүйікті шығармасынан үзінді сахналап, өлеңін оқыды.

Сайыс нәтижесінде барлық қатысушылар арнайы алғыс хаттармен және бағалы сыйлықтармен марапатталды. «Фараб» кітапханасының арнайы ынталандыру стипендиясының иегері Түлкібас ауданынан қатысқан Ақсезім Ғабитқызы, «Ақылдым» республикалық балалар журналының 9 айлық стипендиясын Түркістан қаласының атынан қатысқан Өмірәлі Мадина иеленді. Созақ ауданының қатысушысы Нұрай Қалымбек ІІІ дәрежелі диплом иегері атанса, Кентау қаласынан келген Сарвиноз Садуллаева ІІ дәрежелі диплом иегері болды. Ал, І дәрежелі диплом Бәйдібек ауданынан қатысқан Әділ Рахматуллаға бұйырды. Барлық қатысушы демеушілер ұсынған сыйлықтарға ие болды. Бас демеуші Батырбек Көшербаев 17 қатысушыға «Ақ желкен» республикалық журналына 1 жылдық жазылып сыйға тартты.