ЖАСӨСПІРІМДЕР КІТАПХАНАСЫ ЖАҢА МЕКЕНГЕ ЖАЙҒАСТЫ
- Шымкент қаласы, Әл-Фараби ауданы
Күні кеше ғана Шымкент қалалық жасөспірімдер кітапханасының жаңа мекенжайда ашылу салтанаты өтті. Салтанатты кешке мәдениет саласының өкілдері, ақын-жазушылар, зиялы қауым өкілдері, кітапхана ардагерлері мен мекеме басшылары қатысты.
Шымкент қаласы Мәдениет, тілдерді дамыту және архивтер басқарма басшысының орынбасары Қуаныш Ғалымжанұлының құттықтау сөзімен ашылған кеш шақырылған қонақтардың тілек-лебіздерімен ұштасып, жалғасын тапты.
Ақын-жазушылар атынан сөз алған Нармахан Бегалыұлы, Ханбибі Есенқарақызы және Қазақстан Жазушылар одағы Шымкент қалалық филиалының төрағасы Момбек Әбдәкімұлы кітапхананың әдебиетіміз бен мәдениетімізді танытудағы маңыздылығына тоқталып, жүрекжарды тілектерін жеткізді.
Ән мен күй төгілген кеште «Саз» колледжі, «Қаратау» дәстүрлі өнер мектебінің ұстаздары мен студенттері, «Балдәурен» бағдарламасының жүргізушісі, жас әнші Аяла Жайлаубай, «Болашақ» мектебінің оқушысы Бәйдібек Серікбай әндерінен шашу шашылса, Шымкент қалалық опера және балет театрының бишілері мың бұрала биледі.
«Жас қаламгер» жас ақындар клубы мен «Сырлы сөз» үйірмесінің шәкірттері және №136 орта білім беретін мектеп оқушылары әдеби композициясын ұйымдастырды.
Кеш соңы дастархан жайылып, кітапхана саласына еңбегі сіңген алдыңғы буын азаматтар еске алынып, зиялы қауым өкілдерінің тілек баталарына ұласты.