Елімізде 1 наурыз – «Алғыс айту күні». Бұл күн – тек алғыс білдіру ғана емес, еліміздегі тыныштық пен үндестіктің, барша қазақстандықтарға деген құрметтің орнығуына негіз болған бейбітшілік пен келісімнің мерекесі.

Биылғы мерекенің басты шараларының бірі – «Алғыс керуені» шеруі болды. Шымкент көшелерін ән мен күйге бөлеген керуен бірлік пен татулықты, ізгілік пен мейірімділікті насихаттады. Шеру Әл-Фараби алаңынан басталып, Бауыржан Момышұлы және Желтоқсан көшелері арқылы жүріп өтіп, «Достық» үйінің алдына келіп тоқтады. Бұл символикалық шеруді тамашалаған қала тұрғындары бір-біріне құрмет пен шексіз ризашылықтарын білдіріп, алғысын жаудырып жатты.

Алғыс айту күні мұндай форматта шаһарымызда осымен екінші жыл өткізіліп отыр. «Алғыс керуеніне» қаладағы 500-ге жуық мәдениет пен өнер саласының қызметкерлері қатысты.

Сонымен қатар, Қазақстан халқы Ассамблеясының алдында «Алғыс» қоржынын табыстау рәсімі мен «Мың алғыс» атты театрландырылған қойылымдар мен концерттік бағдарламалар ұсынылды.

Шара барысында түрлі этномәдени бірлестіктер өнер көрсетіп, Қазақстанның көпұлтты халқының татулығы мен бірлігін паш етті.

Мерекелік іс-шараға қала тұрғындары мен қонақтары, Қазақстан халқы Ассамблеясының өкілдері, қоғам қайраткерлері мен жастар қатысты.