Фестивальдің басты мақсаты – ұлттық киноның дамуына серпін беру, жаңа есімдерді ашу және жас авторлардың шығармашылық ізденістерін қолдау көрсету. Байқауға еліміздің түкпір-түкпірінен 30-дан астам қысқаметражды фильм ұсынылып, олардың ішінен 20 үздік туынды ақтық сынға жолдама алды. Қатысушылардың жас ерекшелігі – 18 бен 35 жас аралығында.

Шараның ашылу салтанатына Шымкент қаласы әкімінің орынбасары Сәрсен Абайұлы Құранбек қатысып, фестивальдің маңыздылығына тоқталды. Ол өз сөзінде:

«Шымкент – анимациялық фильмдердің отаны деуге толық негіз бар. Кино – тек өнер ғана емес, ол – тәрбиенің бастауы. Осы арқылы жас ұрпаққа рухани құндылықтарды дәріптеп, қоғамның мәдени деңгейін арттыра аламыз», – деп атап өтті.

Фестиваль аясында қатысушылардың жұмыстарын еліміздегі кино саласының танымал тұлғаларынан құралған қазылар алқасы бағалайды.

Олар:

Қазақстан Республикасының еңбек сіңірген қайраткері, «Мустафа Шоқай», «Келін» фильмдерінің продюсері – Қанат Төребай

Канн фестивалінің «Үздік актриса» жүлдегері – Самал Еслямова

«Айка» фильмінің режиссері, Канн фестивалінің лауреаты – Сергей Дворцевой

«Қошқар мен Теке» анимациялық фильмімен танымал режиссер – Батырхан Дәуренбеков

Қазақстан кинематографистер одағының төрағасы – Адай Әбілдинов.

Айта кетейік, 23 маусым күні фестивальдің жабылу салтанаты мен жеңімпаздарды марапаттау рәсімі Kinopark кинотеатрында, «Hyper House» сауда орталығында сағат 15:00-де өтеді.

Барша киносүйер көрерменді күтеміз!