ӘЛ-ФАРАБИ КІТАПХАНАСЫНА 10 ЖЫЛ ТОЛДЫ
- Шымкент қаласы, Қаратау ауданы
«Кітапхана – өркениет мұрасы». Осылай аталған республикалық конференция Шымкент қаласындағы «Әл-Фараби» атындағы қалалық ғылыми-әмбебап кітапханасында өтті. Бұл шара аталған кітапхананың 10 жылдығына, әрі 24 қазан – «Кітапханашылар күні» кітапханашылардың кәсіби мерекесі қарсаңына орайластырылған жоба. Бұл жайлы «Әл-Фараби» атындағы кітапхананың фейсбук әлеуметтік желісіндегі ресми парақшасы бөліскен.
Шараға ҚР Ұлттық кітапханасы, ҚР Ұлттық Академиялық кітапханасы, сонымен қатар, Астана, Алматы қалаларынан келген кітапхана саласының өкілдері, зиялы қауым, ақын-жазушылар, қалалық кітапхана қызметкерлері мен кітапхана ардагерлері және БАҚ өкілдері қатысты. Конференцияға келген қонақтар кітапхананың көрмесімен танысты.
Салтанатты кеште Шымкент қаласының әкімінің орынбасары Сәрсен Құранбек сөз алып, кітапхана қызметкерлері қашанда рухани жаңалық алыбы, жаңа леп, жайсаң көзқарас жаршысы екенін атап өтті.
– Әл-Фараби кітапханасы – аты затына сай әдебиет пен руханияттың ордасы. Осы жылдар арасында қалалық, республикалық және халықаралық дәрежедегі ғылыми-теориялық шаралар мен кітап көрмелерін өз деңгейінде атқарып келе жатқан абыройлы ұжым. Әл-Фараби бабамыздың даналық еңбектерін насихаттайтын философиялық конференциялар мен жергілікті ақын-жазушылардың бас қосатын ыстық ұясы. Шырайлы шаһарымыздың мәдени дамуы мен рухани өрлеуіне үздіксіз үлес қосып жүрген бірегей кітапхана. Қазіргі таңда Республикалық маңызы бар Шымкент қаласының ең ірі ақпараттық-мәдени орталығы болып табылады, -деді С. Абайұлы.
Салтанатты шарада Сәрсен Абайұлы Шымкент қаласының әкімі Ғабит Сыздықбековтың атынан арнайы кітапхана қызметкерлеріне құттықтау хатын табыс етті.
Конференция барысында философия ғылымдарының докторы, профессор Жақыпбек Алтайұлы Алтаев, этно-дизайыншы, сазсырнайшы, қобызшы-фарабист Кендебай Қарабдалов, тарих ғылымдарының кандидаты, доцент Қайрат Сапарханұлы Анарбаев, Қазақстан Республикасы Ұлттық кітапханасының директоры, Қазақстандық Кітапханалық Одақ төрайымы Бақытжамал Қайырбекқызы Оспанова, Қазақстан Республикасы Ұлттық академиялық кітапханасының директоры Ғазиза Құдайбергенқызы Нұрғалиева, ҚР Ұлттық кітапханасы «Жастар кеңесінің» төрағасы, кітапханашы Ерден Серікханұлы Кабдрашитов баяндамаларын оқып, Әл-Фараби атындағы қалалық ғылыми-әмбебап кітапхана ұжымын арнайы құттықтап, кітапхана директоры Анар Абусайылқызы Жаппарқұловаға арнайы марапаттарын табыстады.
Конференцияның екінші бөлімінде «Әл-Фараби кітапханасы –өркениет мұрасы» атты бейнефильмі көрсетіліп, Ж.Шанин атындағы қазақ академиялық драма театрының әртісі Дүйсенбек Аралбаев Әл-Фараби монологын оқыды.
OpenKazakhstan-INFORM